صديقي العزيز - انتخابات 2

صديقي العزيز انا كنت بعتلك قبل كده رسالة وقلت لك اني سعيد اني بتواصل معاك وساعتها كنت بأيد د/عبدالمنعم ابوالفتوح لرئاسة الجمهورية , ديه بقى رسالة تانية تدل على مدى سعادتي بالتواصل معاك.

- صديقي العزيز انا عارف ان بعض الاحباط وصلك وممكن يكون تملك منك كمان , بس أحب اقولك "انها ما ضاقت إلا ما فرجت" , وإن عنترة بن شدد قال "لو لم يصرخ لصرخت أنا" . وان عمر المختار قال : "يمكنهم هزيمتنا إذا نجحوا باختراق معنوياتنا" , ودا الهدف حاليا اننا نيأس بس هم ميعرفوش اننا جيل صعب انه يتكسر وانه صعب يفرط في طموحاته.

- صديقي العزيز في احتمال انك تنتخب مرسي او شفيق , يا ريت تفكر ألف مرة بعقلك ومش بعواطفك بعيدا عن الاعلام الكاذب اللي بيتميز بالعهر. وانت اكيد عندك قدرة على التحليل بمجرد ما ترجع لسنة ونص او لعشر سنين للخلف وتتذكر مين اللي سرق اختلس او اللي سجن او اللي قتل او اللي عملك ارهاب امني. تذكر رغيف العيش وامبوبة البوتاجاز  وبنزين العربية, ورشوة استخراج الرخصة. 

- صديقي العزيز ممكن تكون قررت انك تقاطع او تبطل صوتك , أحب أأكد عليك وأقولك ان اي عدد هيروح ينتخب - ايان كان العدد - فهم هيختاروا رئيسك القادم. فمشاركتك مهمة رغم معرفتي بان الاختيار بين المرشحين دلوقتي بقى مر بالنسبة للبعض , والبعض منا مش متقبله.

- صديقي العزيز أوعى تبطل صوتك او تقاطع او تعطي صوتك لمرشح مش في مصلحة البلد مجرد ان مرشح تاني ندل معاك في موقف او جرح فيك بعدة مواقف او كان ليه اراء غير ارائك في مواقف اخرى.

- صديقي العزيز رغم اني اتأذيت من النظام المجرم بتاع حسني مبارك وان صديقي اشرف نبيل تم اعتقاله من ايام قليلة لأنه كان بيعبر عن رأيه بأفلامه الصغيرة اللي بيخرجها وبينتقد فيها مرشح رئاسي إلا اني مش بحب استخدم لغة التخويف لجعل الاخر يتخذ قرار معين.

- صديقي العزيز لو قدر الله واستمر النظام المستبد او جاء نظام لا نرتضيه فمينفعش ان نفسنا يكون قصير. ولازم نتعاهد اننا مش هنسمح اننا نعيش في نظام فاسد او مستبد و اولادنا يمروا بالفساد والاستبداد اللي احنا مرينا به وعايشناه.

- صديقي العزيز زمان كانوا بيدرسولنا التاريخ واحنا صغيرين دلوقتي احنا اللي بنعمل التاريخ. عشان كده لازم تُحسن اختيار قراراتك لان دورك في التاريخ هيتكتب ضمن المجموعة اللي اخدت قرار معين.

صديقي العزيز .. المشوار طويل .. خلي نفسك كبير.

تحياتي القلبية 
اسلام ابوغزاله